fbpx

كل ما تود أن تعرفه عن فيروس كورونا 2020 من مصادر موثوقة طبياً بطريقة مبسطة

كل ما تود أن تعرفه عن فيروس كورونا 2020 من مصادر موثوقة طبياً بطريقة مبسطة

فيروس كورونا :
هي عائلة من الفيروسات اسمها Corona viruses وأغلبها غير خطير وبتسبب أعراض الإنفلونزا المشهورة. وأغلب سلالات الفيروس متواجدة في الحيوانات.. طيب ايه الجديد الي حصل؟

الي حصل إن إحدى سلالات الفيروس اتنقلت من الحيوانات للإنسان لأول مرة واسم السلالة SARS CoV-2
طيب اشمعنى حصل ده الوقتي؟
في الغالب بيحصل طفرات باستمرار في الفيروسات وفي حالتنا حصلت طفرة وبناء عليها بقى الفيروس قادر انه يصيب الإنسان، ثم مع أول تواصل بين الحيوان حامل الفيروس وبين الإنسان تم الانتقال.
والمصدر هو غالبا الخفاش أو حيوان البنغول (بناء على تشابه الدنا DNA).

ما هي أعراض فيروس كورونا ؟ وما هي طرق الوقاية منه ؟

 اسم المرض:
المرض الي بيسببه الفيروس الي قلنا عليها، تم تسميته COVID19 وأصبح ده اختصاره العالمي. ومعناه كالآتي
CO= Corona
VI= Virus
D= Disease
19= ظهر في أواخر سنة 2019

COVID19= Corona Virus Disease 2019

المنشأ/ المصدر:

المكان الي ظهر فيه الفيروس وأول حالات الإصابة هي مدينة ووهان في الصين، والانتقال تم إما في متجر بيع حيوانات أو مكان للأكل.

طريقة الانتشار فيروس كورونا :

الفيروس بيستقر في الجهاز التنفسي للإنسان، تحديدا في الخلايا المخاطية وخلايا الحويصلات الهوائية، وبالتالي بيخرج مع الرذاذ

لما الشخص يكح أو يعطس وبيدخل للشخص الجديد عن طريق الفم/ الأنف/ العين وبعدها يستقر في نفس المكان

ويبدأ يسبب المشاكل والمضاعفات. ودي طريقة الانتشار الأساسية.

كذلك ملامسة الأسطح قد تنقل المرض لأن الفيروس يقدر يعيش خارج الجسم الحي لكن مش لفترة طويلة وبالتالي الطريقة الأولى هي الأساس.

الهوا مش بينقل المرض على المسافات

البعيدة لكن بينتقل في الأماكن القريبة لذلك لو حد جنبك عليه أعراض المرض ابتعد عنه وخلي مسافة لا تقل 1-2 متر وخلي بالك.

 أعراض المرض فيروس كورونا:

مبدئيا هو ليه فترة حضانة (الفترة بين الإصابة وبين ظهور الأعراض) من 2-14 يوم. الأعراض بتبدأ من سخونية وكحة وعطس واحتقان في الزور (زي أي دور برد) ودا بيمثل 80% من الحالات،

وصولا لضيق وقصور في التنفس وقد يتطور الأمر لالتهاب رئوي

(15% من الحالات)، التطور الأخطر هو متلازمة ضيق التنفس الحاد ARDS والموت لا قدر الله (2-3% من الحالات).

لقوا إن أغلب الحالات الي بيحصل فيها مضاعفات ووفيات هي كبار السن وخصوصا فوق 60-70 سنة،

مع وجود مشاكل صحية مسبقة زي أمراض القلب والضغط العالي والسكري، كمان التدخين ليه دور في زيادة نسبة حصول مضاعفات.

نسبة من المصابين بيحتاجوا حجز في المستشفى ونسبة من الي دخلوا المستشفى بيدخلوا رعاية مركزة ونسبة

منهم بيجيلهم متلازمة ضيق التنفس الحاد ARDS ودول الي بيكون منهم حالات الوفاة (2-3%).
.

هل ليه علاج/ لقاح فيروس كورونا؟

لحد الوقتي مفيش علاج ولا مصل (لقاح/تطعيم) وحاليا بيتم التعامل مع أعراض المرض زي خفض درجة الحرارة

ودعم مناعة الجسم ووضع المريض على جهاز تنفس صناعي لو لزم الأمر،

لكن أغلب الحالات بتعدي وبيتم الشفاء منها..

وكل المؤسسات الطبية العالمية شغالة على آخرها عشان تكتشف علاج ليه.

بالنسبة للمصل/ اللقاح.. ف متوقع يكون موجود لكن في فترة لا تقل عن 12-18 شهر.

لأن عملية إنتاج المصل معقدة وبتاخد فترة عشان يتم التأكد من فعالية اللقاح الجديد.. لكن العلاج هيظهر قبله إن شاء الله.

التشخيص:

الأعراض بتدي مؤشر مبدئي وكمان سفر الشخص لمكان موبوء أو مخالطته لأشخاص مصابين بتعلي نسبة انتقال الفيروس إليه،

لكن عموما التشخيص الأكيد مش بيتم غير بعد أخذ عينة مخاط من

الجهاز التنفسي وعمل فحص معين اسمه PCR test وآلية عمله إنه بيكشف على الحمض النووي للفيروس DNA ويشوف إذا كان موجود ولا لأ.

 هل أول مرة مرض زي كدة يظهر من عائلات فيروس كورونا؟

لأ، آخر مرتين حصل فيهم حاجة شبيهة كان في 2002 مرض اسمه SARS2002 أصاب 8100 حالة وكان نسبة الوفيات 9.6%
وفي 2012 ظهر مرض في الشرق الأوسط اسمه MERS2012 وأصاب 2500 شخص والوفيات كانت 34%
الملاحظ المرة دي في COVID19 انه سريع الانتشار جدا مقارنة بالمرتين الي فاتوا لكن نسب الوفيات أقل بكتير 2-3%.

الانتشار إلى الآن:
لحد الوقتي منظمة الصحة العالمية أعلنت عن 83000 حالة بينهم حالات كتير تم التعافي من المرض و2800 حالة وفاة. والأرقام دي بتتغير بسرعة.

 الاحتياطات (نعمل ايه)؟

– أول حاجة انه لا يجب الخوف أو الهلع، مش أول مرة تحصل حاجة زي كدة ف اعمل الي عليك من غير قلق زايد.

– حافظ على النظافة الشخصية واغسل ايدك بالمية والصابون كويس كل شوية، خصوصا قبل الأكل وقبل لمس فمك/أنفك/عينك، وممكن تستخدم مطهرات/معقمات اليد.
– تبعد عن أي شخص عليه علامات المرض وتسيب مسافة لا تقل عن 1-2 متر.
– استخدم المناديل لما تيجي تكح أو تعطس وارميها على طول.

– البقاء في البيت قدر الإمكان والبعد عن الأماكن العامة والمزدحمة وتجنب السفر لغير ضرورة.

– مش بالضرورة تلبس كمام إلا لو عليك علامات المرض او تحت رعايتك أحد المرضى.
– تجنب المراحيض والحمامات العامة قدر الإمكان وتجنب لمس أي شيء فيها.

– ابتعد عن الحيوانات عموما مادام لأغراض غير ضرورية. الحيوانات المنزلية لم يثبت أن في منها خطورة لكن خذ حذرك واغسل ايدك كويس.

– لو حسيت بأعراض المرض كلم أقرب مستشفى ليك وعرفهم حالتك.
– علم أطفالك والي حواليك وساعد في نشر المعلومات الموثوقة طبيا والابتعاد عن الشائعات.

عادات يومية بسيطة للصحة واللياقة والعافية للحفاظ على الجسم من الفيروسات

اترك رد

لن يتم نشر عنوان بريدك الإلكتروني.