نفسك تتعلم انجليزى لكن بتواجهك مشاكل تبدأ ازاى ومن انهى مستوى
أول حاجه لازم تعملها إنك تكون واقعى شويا وصبور … يعنى مفيش حاجه اسمها انا ف 3 شهور او 4 شهور لازم أكون fluent علشان محتاج اللغة جدا ….
لأ ده غلط … عاوزك تبدل الجملة دى ب عاوز أكون fluent فأقل وقت ممكن وهنا بقا التفسير التانى .
اقل وقت ممكن بتعتمد على ايه يا مستاااااار
بتعتمد على الجهد ، العزيمة ، الاستمرارية ، الحب ، الاستمتاع ، الممارسة ، المعايشة ، بس كده يا سيدى هو ده اللى انتا محتاجة.
جهد جبار فعلا يتوافق مع هدف شخص محتاج يكون قوى فلغة مش بتاعته.
عزيمة قوية علشان ميضعفش فمنتصف الطريق ويضيع حلمه
الاستمرارية ودى أهم حاجه ممكن تحتاجها لأن من غيرها يبقا انتا كده مش هتتعلم
الحب ..أيوة بتكلم جد الحب … إنك تكون حابب تتعلم English علشان تقدر تستمتع باللغة وانتا بتدرسها
الممارسة … لأنك لو مش عملت كده هتتحول إلى مجرد آله للحفظ واللغات لا يمكن اكتسابها بالحفظ
واخيرا المعايشة بقا. والمعايشة غير الممارسة لأن المعايشة انك تكون جزء من كل حاجه بتتعلمها وبتكتسبها وتبدأ تعتبر نفسك شخص عايش هناك ومحتاج يتكلم ويعبر وده وقت معين يوميا.
لحد كده دى الشروط . يلا بينا نشوف الطريقة نفسها بقا للتعلم …. تتعلم ازاى يا صديقى
أولا : حصيلة الكلمات لازم تزيد. هتقول بنسى بسرعه يا دكتور . لأن احنا بنحفظ غلط
الكلمات يا سيدى الفاضل هتحفظ الكلمة لما تقرأ الشرح بتاعها English وتعرف معناها بالعربى بس .
ولازم تعمل مثال على كل كلمة امتا تتعلمها جديد عن حاجه حصلت فحياتك او هتحصل واوعدك مش هتقدر تنسى أبدا .
ثانيا : لازم تسمع كل يوم على الاقل 3 ساعات English مهما حصل بين :
برامج توك شو والبرامج كتير اوى احسنهم Steve kids كبداية .
أخبار وفيديوهات وثائقية
ودول كتير اوى بردو سواء قنوات على الأقمار الصناعية زى
Fox news , Abc American , Nile English , Jsc news
وعلى الانترنت نشرات مباشرة طول الوقت وعلى فيس بوك كمان فال live videos وملكش اى حجه .
افلام وأغاني ومسلسلات
وده مهم اوى لكن ياريت يكون بدون ترجمه ( هيكون ممل فالأول ) ويكون معاه subtitle English يعنى إللى تسمعه يكون مكتوب قدامك وده يحصل ازاى هقولك :
أولا يوتيوب مليان جدا جدا جدا افلام من النوع ده والاغانى كلها بتاعتهم متوفرة كده.
ولو انتا معاك فلوس وتقدر تدفع 100 جنية فالشهر اشترك ف Netflix عليه اكتر من مليون فيلم ومليون مسلسل بتختار انتا لغه المسلسل وكمان لغه الترجمة و اكيد هنختار الاتنين English
ثالثا : تدون بالورقة والقلم اى كلمة جديده تسمعها ففيلم أو اغنية او اى حاجه و يا سلام بقا لما تبحث عن الكلمة دى علشان يكتمل المعنى ( عمرك ما هتنساها أبدا ) صدقنى
رابعا : القراءة
ودى مهمه جدا حتى لو انتا شايف نفسك ممكن تقرأ غلط لأن القراءة هتخليك تحفظ كلمات كتير وتبحث كتير وده المطلوب
خامسا : النطق
اكيد النطق هيتحسن مع الاستماع الكتير لأن دى سنه الحياة … لو طفل من أب وأم من الصعيد اتولد بالإسكندرية الأكسنت عنده بتكون ايه ؟
بالظبط كده ده اللى هيحصل معاك لكن محتاج تاخد الجزء الأكاديمي وهو الفوناتكس والرموز الصوتية وده ممكن تاخده معايا انا عادى ان تدخل على YouTube وتكتب
How can I pronounce ( )
وتكتب حرف حرف وتعرف الرموز والأصوات علشان تعرف النطق من القاموس بعد كده مش لازم تسمعه من حد .
أخيرا بقا ال Grammar
أولا : تشوف شرح القاعده بالعربى من أى شخص على يوتيوب علشان تاخد فكرة . وبعد كده تشوف الشرح ده على يوتيوب بردو بالانجلش وبعد كده تلخص وتدخل تحل تدريبات أون لاين وخلاص الكلام .
ترتيب الدروس خده من اى ابليكيشن واحسنهم انجلش جرامر وال BBC .
قنوات العربى الشرح كتير
ZAmerican English
كيف تعلم نفسك اللغه الانجليزيه وتتكلمها بطلاقه
الانجلش بقا :
BBC learning English
Learn English
Learn English 101
وغيرهم ومن أشهر الناس فشرح الجرامر واحده اسمها اليشا سهله اوى
الأماكن اللى تحل منها :
هتكتب اسم القاعده انجلش وتزود كلمة quizzes بس يعنى مثلا
Present simple quizzes
بس كده يا سيدى وان شاء الله تدعيلى
وكمان دى مصادر للتعلم استمتع بتعلم الانجليزية مجانا
أفضل 5 مواقع تقدم كورسات مجانية ومدفوعة أون لاين بشهادات معتمدة
خمسة مصادر سوف تساعدك فى تحسين لغتك الانجليزية
أفضل 10 مواقع تساعدك فى تعلم لغات جديدة للمبتدئين
كورس الشامل لتعلم الانجليزية Reading , Listening , writing , speaking
